በኢ.ፌ.ዲ.ሪ. የፍትሕ ሚኒስቴር ሚኒስትር ዴኤታ ክቡር አቶ በላይሁን ይርጋ የተመራ የልዑክ ቡድን በቱርኪዬ – አንካራ በመገኘት ከተለያዩ የመንግሥት የበላይ አመራር እና የስራ ሃላፊዎች ጋር በሕግና በፍትሕ ሁለትዮሽ ጉዳዮች ዙሪያ ውይይት በማድረግ ላይ ይገኛል፡፡
በዚህም መሠረት ክቡር ሚኒስትር ዴኤታው እና በቱርኪዬ ሪፐብሊክ የፍትሕ ምክትል ሚኒስትር ክቡር ሚ/ር ሁርሺት ይልድሪም (Hurşit YILDIRIM) መካከል በሁለቱ ሀገራት በፍትሕ ዘርፉ ያለው የሁለትዮሽ ግንኙነትና ትብብር በሚጠናከርበት ሁኔታ ዙሪያ ውይይት ጥር 13 ቀን 2017 ተካሄዷል፡፡
በዚህ ወቅት ክቡር ሚኒስትር ዴኤታው እንደገለፁት በኢትዮጵያ እና በቱርኪዬ መካከል ዘመናትን ያስቆጠረ የሕዝብ ለሕዝብ ግንኙነት መኖሩንና በአሁኑ ወቅት በፖለቲካ፣ በኢኮኖሚ፣ በኢንቨስትመንት እና በመሳሰሉት ያለው ትብብር እየተጠናከረ መምጣቱን ገልፀው ይህ ግንኙነት በሕግና በፍትሕ ጉዳዮች ጭምር ተጠናክሮ እንዲቀጥል ለማድረግ በኢትዮጵያ በኩል ከፍተኛ ፍላጎት መኖሩን፣ ይህን ከማሳካት አንጻር ከፍተኛ አስተዋጽኦ ያላቸው ስምምነቶች እና መግባቢያ ሰነዶች ባለፉት ሁለት ዓመታት የተፈረሙ ሲሆን በኢትዮጵያ በኩል መጽደቅ የሚገባቸው የሁለትዮሽ ስምምነቶች በሚኒስትሮች ም/ቤት ተቀባይነት አግኝተው በሕዝብ ተወካዮች ም/ቤት የፀደቁ መሆናቸውን፣ በቱርኪዬ በኩልም በተመሳሳይ ቅድሚያ እና ትኩረት አግኝተው እንዲፀድቁ እና ወደስራ እንዲገቡ እንደሚደረጉ ያላቸውን እምነት ገልፀዋል፡፡ በተጨማሪም በዚሁ ወቅት የሁለቱ ሀገራትን ትኩረትና ትብብር የሚፈልጉ ሌሎች ጉዳዮች ተነስተው ውይይት ተደርጎባቸዋል፡፡
በዚህ ጊዜ የቱርኪዬ የፍትሕ ምክትል ሚኒስትሩ እንደገለፁት ሁለቱ ሀገራት ቀደምት ታሪክ ያላቸው፣ ግንኙነታቸው ረጅም ዘመን ያስቆጠረ መሆኑን አስታውሰው ይህ ግንኙነታቸው በፍትሕ ዘርፍ እንዲጠናከር በትብብር ለመሥራት ያላቸውን ቁርጠኝነት እና በሁለቱ ሀገራት መካከል የተፈረሙት መጽደቅ የሚፈልጉት ስምምነቶች እንዲፀድቁ ለማድረግ አስፈላጊውን ሁሉ በአጭር ጊዜ እንደሚያደርጉ ገልፀዋል፡፡ በተጨማሪም በዚሁ ወቅት ትብብር ከሚደረግባቸው ፍትሕ ነክ ጉዳዮች ጋር በተያያዘ ከምክትል የፍትሕ ሚኒስትሩ ባሻገር ከሌሎች መ/ቤቶች የመጡ የሚመለከታቸው ኃላፊዎች ያላቸውን ሃሳብ ሰጥተዋል፡፡
ከፍትሕ ሚኒስትር ዴኤታው ጋር በመሆን በፍትሕ ሚኒስቴር የፍትሐብሔር ፍትሕ አስተዳደር ዳይሬክተር ጄኔራል አቶ ሄኖክ ተስፋዬ እና በሕግ ጉዳዮች ዓለም አቀፍ ትብብር ዳይሬክተር አቶ የሱፍ ጀማው እንዲሁም በቱርክ የኢ.ፌ.ዲ.ሪ. ኤምባሲ ም/አምባሳደር ክቡር አቶ ሙሌ ታረቀኝ እና አቶ ይርጋ ተገኝተዋል፡፡
