የኢ.ፌ.ዴ.ሪ ፍትሕ ሚኒስቴር የመንግስት ህግ እና ፍትሕ አገልግሎት ዘርፍ ሚኒስትር ዲኤታ ክቡር አቶ በላይሁን ይርጋ ከአየርላንድ ፍትሕ ሚኒስቴር የፍልሰት ጉዳዮች ሚኒስትር ዲኤታ ክቡር ኮልም ብሮፒ (H.E. Colm Brophy) ጋር በፍልሰትና ተያያዥ ጉዳዮች ዙሪያ ውይይት አድርገዋል።
በውይይቱ ወቅት የአየርላንዱ ክቡር ሚኒስትር ዲኤታ ከረጅም ዓመታት በኋላ ወደ ኢትዮጵያ በመምጣታቸው የተሰማቸውን ደስታ ገልጸው በተለይም በእነዚህ ዓመታት ውስጥ በአዲስ አበባ የተመለከቷቸው ዘርፈ-ብዙ ለውጦች እንዳስገረሟቸው ተናግረዋል።
የሁለቱ ወገኖች ውይይት በዋናነት በአሁኑ ወቅት ዓለም አቀፋዊ አጀንዳ በሆነው የፍልሰት ጉዳይ ላይ ያተኮረ ሲሆን በተለይም በፍልሰተኞች ሰብዓዊ መብት አያያዝና ጥበቃ ዙሪያ ሰፊ ምክክር ተደርጓል። የአየርላንድ መንግስት በኢትዮጵያ የሚገኙ የሱዳን ፍልሰተኞችን የቋንቋና የተለያዩ ስልጠናዎችን በመስጠት ወደ አየርላንድ ወስዶ በማስፈር አዲስ ሕይወት እንዲመሰርቱ ለማድረግ መዘጋጀቱን የገለጹት ክቡር ሚኒስትር ዲኤታው፣ ለዚህም ተግባራዊነት የኢትዮጵያን መንግስት ድጋፍ እንደሚፈልጉ ጠቁመዋል።
ክቡር ሚኒስትር ዴኤታ አቶ በላይሁን ይርጋ በበኩላቸው፤ አገሪቱ ባለፉት የለውጥ ዓመታት ለፍልሰት አስተዳደር ትልቅ ትኩረት ሰጥታ እየሰራች መሆኑን አብራርተዋል። ከእነዚህም መካከል በምክትል ጠቅላይ ሚኒስትር የሚመራ ምክር ቤት ተቋቁሞ ወደ ስራ መግባቱን፣ የተለያዩ የፍልሰት ቡድኖች ተዋቅረው በፍትሕ ሚኒስቴር አስተባባሪነት እየሰሩ መሆኑን እና ጉዳዩ የአንድ አገር ብቻ ባለመሆኑ ከበርካታ አገራት ጋር የትብብር ስምምነቶች መፈረማቸውን አስገንዝበዋል።
አክለውም ኢትዮጵያ በፍልሰተኞች ረገድ መነሻ፣ መተላለፊያና መዳረሻ አገር እንደመሆኗ መጠን፣ የአየርላንድ መንግስት ያቀረበውን ጥያቄ ስኬታማ ለማድረግ የኢትዮጵያ መንግስት የበኩሉን ድጋፍ ለማድረግ ዝግጁ መሆኑን አረጋግጠዋል። በመጨረሻም፣ የእለቱ ውይይት በሁለቱ አገራት መካከል ጠንካራ ግንኙነት ለመፍጠርና በቀጣይም በፍልሰትና በሌሎች ተያያዥ የፍትሕ ጉዳዮች ዙሪያ በጋራ ለመስራት መልካም መሰረት የሚጥል መሆኑን በመግለጽ፣ ለአየርላንድ መንግስት ለሰጠው ትኩረት ምስጋናቸውን አቅርበዋል።
