ኢትዮጵያ እና ናይጄሪያ በሕግና ፍትሕ ጉዳዮች የሁለትዮሽ ትብብር ጉዳዮች ዙሪያ መከሩ

የኢ.ፌ.ዲ.ሪ ፍትሕ ሚኒስቴር ሚኒስትር ክብርት ወ/ሮ ሐና አርአያስላሴ በአገራችን የስራ ጉብኝት በማድረግ ላይ ከሚገኙት የናይጄሪያ ፌዴሬሽን ጠቅላይ ዐቃቤ ሕግና የፍትሕ ሚኒስትር ክቡር ሚ/ር Lateef Olasunkanmi Fagbemi ጋር በሁለቱ አገራት የጋራ ጉዳዮች በተለይም በሕግና ፍትሕ ጉዳዮች የሚደረጉ ትብብሮችን በተመለከተ የጋራ ምክክር ሰኔ 3/2018 ዓ.ም አድርገዋል።

ክቡር ሚኒስትሩ ወደ አዲስ አበባ ሲገቡ ለተደረገላቸዉ ደማቅ አቀባበል እና መስተንግዶ ምስጋናቸውን የገለፁ ሲሆን፣ ሁለቱ አገራት በተለያዩ ዘርፎች አብሮ በመስራት ሂደት ለአመታት የዘለቀ ጠንካራ እና ዉጤታማ ግንኙነት እንዳላቸው አንስተው በተለይም ከፍትሕ ዘርፉ ጋር በተያያዘ በጋራ ጉዳዮች ዙሪያ በቀጣይ አብረው ለመስራት ውይይቱ ከፍ ያለ ጠቀሜታ እንዳለው አንስተዋል።

በምክክሩም ድርድሩ የተጠናቀቀውና በዛሬው ዕለት ይፈረማል ተብሎ ስለሚጠበቀው ፍርደኞችን የማስተላለፍ ስምምነት እንዲሁም ሌሎች በሂደት ላይ የሚገኙ የሁለትዮሽ ስምምነቶችን በማጠናቀቅ ለፊርማ ዝግጁ ማድረግ በሁለቱ አገራት መካከል ያለውን ግንኙነት በማጠናከር ረገድ ስላለው አስተዋፅኦ፤ ድንበር ተሻጋሪ ወንጀሎችን በመከላከል ረገድ በሁለቱ አገራት መካከል የሚኖሩ ትብብሮች ለሁለቱም አገራት ስለሚያስገኙት ጠቀሜታ፤ ማረሚያ ቤቶችን በማሻሻል ረገድ በአገራችን በኩል ስለተከናወኑ የሪፎርም ተግባራት እንዲሁም በሁለቱ አገራት መካከል የልምድ ልውውጥ ሊደረግባቸው የሚችሉ ተሞክሮዎችን በተመለከተ ሰፋ ያለ ውይይት ተደርጓል።