በኢትዮጵያ እና ናይጄሪያ መንግስታት መካከል ፍርደኞችን ለማስተላለፍ የሚያስችል የሁለትዮሽ ስምምነት አደረጉ

በኢትዮጵያ ፌዴራላዊ ዲሞክራሲያዊ ሪፐብሊክ እና በናይጄሪያ ፌዴሬሽን መካከል ፍርደኞችን ለማስተላለፍ የሚያስችል የሁለትዮሽ ስምምነት የፊርማ ሥነ ሥርዓት ሰኔ 03 ቀን 2018 ዓ.ም በአዲስ አበባ ተከናውኗል።

በኢትዮጵያ በኩል ስምምነቱን የፈረሙት የኢ.ፌ.ዲ.ሪ የፍትሕ ሚኒስትር ክብርት ወ/ሮ ሐና አርዓያስላሴ ሲሆኑ በናይጄሪያ በኩል የሀገሪቷ ጠቅላይ ዐቃቤ ሕግና የፍትሕ ሚኒስትር ክቡር ሚ/ር Lateef Olasunkanmi Fagbemi ናቸው።

በፈርማ ሥነ ሥርዓቱ የሁለቱ አገራት ግንኙነት ረጅም ጊዜ ያስቆጠረ መሆኑ የተነሳ ሲሆን አገራቱ በተለያዩ ዘርፎች በትብብር በመስራት ላይ ስለመሆናቸው ተጠቅሷል። በፍትሕ ዘርፍ ያለውን ግንኙነት ለማጠናከር የተፈረመው ስምምነት ትልቅ መነሻ እንደሚሆን እንዲሁም በዕለቱ ከተፈረመው የፍርደኞች ማስተላለፍ ስምምነት በተጨማሪ በሌሎች የሕግ ጉዳዮች በትብብር ለመስራት ሁለቱ አገራት ዝግጁነታቸውን ገልፀዋል።

ስምምነቱ በአግባቡ እንዲፈጸም ትኩረት መስጠት እንደሚገባ በፊርማ ሥነ ሥርዓቱ ላይ የተጠቆመ ሲሆን በዚሁ ወቅት የሁለቱም አገራት የፍትሕ ሚኒስትሮች ስምምነቱን ተፈጻሚ ለማድረግ ያላቸውን ቁርጠኝነት እና ዝግጁነት ገልጸዋል።