በመሬትና በቤተሰብ ጉዳዮች ላይ ያተኮረ የሁለት ቀን ውይይት በአዲስ አበባ ተካሂዷል

ዝግጅቱን ያስተባበሩት ፍትሕ ሚኒስቴር ፣ የሄግ የሕግ ጉዳዮች ምርምር ተቋም (HiiL) እና ዴስቲኒ ኢትዮጵያ ናቸው።

የሁለት ቀን መድረኩን በንግግር የከፈቱት በፍትሕ ሚኒስቴር የፍትሕ ሥርዓት ማሻሻያ እና ለውጥ ሥራ አመራር ዳይሬክቶሬት ዳይሬክተር የሆኑት አቶ ኖህ ታከለ ባስተላለፉት መልዕክት የሄግ የሕግ ጉዳዮች ምርምር ተቋም (HiiL) ላለፉት አራት አመታት የፍትሕ ሥርኣቱን ለማገዝ የተለያዩ እገዛዎችን ሲያደርግ መቆየቱን ጠቅሰው በተለይም የፍትሕ ፍላጎቶች ዳሰሳ ጥናት በማድረግ በሀገሪቱ ውስጥ ሰዎችን ያማከለ ፍትሕን ለማሻሻል መሥራት ቅድሚያ የሚሰጠው ጉዳይ መሆኑን በማሳየቱ የሦስት አመቱ የፍትሕ አካላት ትራንስፎርሜሽን ውጥ የማኅበረሰብ አቀፍ ፍትሕ አገልግሎት እንደ አንድ ትልቅ አምድ ተወስዶ እየተሰራበት መሆኑን ገልጸዋል።

በመድረኩ ላይ ዳኞች፣ የፍትሕ ሚኒስቴር መካከለኛ አመራሮች፣ ጠበቆች፣ የዩኒቨርሲቲ መምህራን፣ የሃይማኖት ተቋማት ተወካዮች፣ የሲቪል ማኅበረሰብ ድርጅቶችን ጨምሮ የተለያዩ ባለድርሻ አካላትን አሰባስቦ በኢትዮጵያ ከመሬትና ከቤተሰብ ጉዳይ ጋር በተያያዙ ውስብስብ ችግሮች ላይ አዳዲስ መፍትሄዎችን ላይ ጥልቅ ውይይት ተደርጓል።

መድረኩን ያስተባበሩት ፍትሕ ሚኒስቴር ፣ የሄግ የሕግ ጉዳዮች ምርምር ተቋም (HiiL) እና ዴስቲኒ ኢትዮጵያ ይህንን አስፈላጊ ስራ ለማስቀጠል ያላቸውን ቁርጠኝነት የገለጹ ሲሆን መድረኩን በሦስት ዙር ለማስቀጠል ተስማምተዋል። የዚህ ክስተት ስኬታማነት ውስብስብ የሆኑ የሕግ ችግሮችን ለመፍታት የትብብርና አዳዲስ አቀራረቦች ጠቀሜታን የሚያጎላ ከመሆኑም በላይ በኢትዮጵያ የፍትሕ ፈጠራ ወደፊት ተስፋ ሰጪ መሆኑን ያመላክታል።