የህዝብ ተወካዮች ምክር ቤት የሕግና ፍትሕ ጉዳዮች ቋሚ ኮሚቴ የተመሩለትን ዓለማቀፋዊ የሕግ ትብብር ረቂቅ አዋጆች ዙሪያ ታህሳስ 20 ቀን 2018 ዓ.ም ከአስረጅዎች ጋር ውይይት አድርጓል።
ህዳር 25 ፣2018 ዓ.ም፤ በምክር ቤቱ 3ኛ መደበኛ ስብሰባ ከሶስት ሃገራት ጋር ከወንጀልና ፍርደኛን የማስተላለፍ ጉዳዮች ላይ የተደረጉ አራት የሁለትዮሽ ስምምነቶች ለቋሚ ኮሚቴው መመራቱ ያታወሳል።
ሥምምነቶቹ ኢትዮጵያ ፍርደኞችን ለማስተላለፍ ከቻይና፣ብራዚል እና ደቡብ አፍሪካ ጋር ያደረገቻቸው ትብብሮችና በተመሣሣይ በኢትዮጵያ እና በቻይና መንግስታት መካከል የተደረገው የወንጀል ጉዳዮች የጋራ የሕግ ትብብር ረቂቅ አዋጆች እንደሆኑ ተገልጿል።
በዉይይቱ ወቅት ረቂቅ አዋጆቹ ፋይዳቸው ወንጀልን ከመከላከል በላይ ነው ያሉት የቋሚ ኮሚቴው ሰብሳቢ የተከበሩ ወ/ሮ ዕፀገነት መንግስቱ የሁለትዮሽ ሥምምነቱን የሚፈርሙት ሀገራት የBRICS አባል ሀገራት በመሆናቸው አዋጆቹ ብዙ ኢኮኖሚያዊ፣ ፖለቲካዊ እና ስትራቴጂካዊ የትብብርን የሚያጠናክሩ እንደሆኑ አብራርተዋል።
የፍትሕ ሚኒስቴር ሚኒስትር ዴኤታ ክቡር አቶ በላይሁን ይርጋ በበኩላቸው እነዚህ ስምምነቶች ሀገራት በሰጥቶ መቀበል መርህ በሁለቱም ወገን የሀገራቸውን ጥቅም የሚያስከብሩባቸው ስምምነቶች እንደሚሆኑ አመላክተዋል።
ሚኒስትር ዴኤታዉ አክለዉም የፖለቲካ ወንጀለኞችን አሳልፎ መስጠት ግን ዓለማቀፋዊ ስምምነቶችም እንደማይፈቅዱ ተናግረዉ ከሽብርተኝነት ጋር የተገናኘ ከሆነ ግን በስምምነቶቹ መሠረት ማስተላለፍ እንደሚቻል ገልፀዋል።
በረቂቅ አዋጆቹ ላይ የቋሚ ኮሚቴው አባላትና በም/ቤቱ የህግ ባለሙያዎች ጥያቄና አስተያየቶች ቀርበው ሰፊ ውይይት የተደረገባቸው ሲሆን በተገኘው ግብዓት መሠረት ማስተካከያ ተደርጎባቸው እንደሚፀድቁ ተጠቁሟል።
ምንጭ፡- የህዝብ ተወካዮች ምክር ቤት
