የፍትሕ ሚኒስቴር ሚኒስትር ዴዔታ አቶ በላይሁን ይርጋ በኢትዮጵያ የኮሎምቢያ አምባሳደር ከሆኑት ይሶን አርካዲዮ ጋር በሰላም እና ፍትሕ ዙሪያ ኢትዮጵያ እና ኮሎምቢያ በጋራ በሚሰሩበት ሁኔታ ዙሪያ ምክክር አድርገዋል፡፡
ኃላፊዎቹ ባደረጉት ውይይት ሁለቱ አገራት ከሽግግር ፍትሕ አንጻር የሚለዋወጡት ልምድ መኖሩን ገልጸው በጥናት እና ምርምር፣ በዓለም ዓቀፍ እና የባለድርሻ አካላት ምክክር መድረኮች አማካኝነት የእውቀት እና ልምድ ልውውጥ ለማድረግ ተስማምተዋል፡፡
በሁለቱ ዓገራት የሚገኙ ከፍተኛ የትምህርት ተቋማት በጋራ ለመሥራት የሚችሉበትን ሁኔታ ለመፍጠር በኢትዮጵያ በኩል የኢትዮጵያ የሕግ ትምህርት ቤቶች ማህበር ከኤምባሲው ጋር አብሮ መሥራት መጀመሩ የተጠቀሰ ሲሆን ፍትሕ ሚኒስቴርም የሽግግር ፍትሕ ትግበራ ምዕራፍ አስተባባሪ እንደመሆኑ መጠን በትምህርት ተቋማቱ መካከል የሚደረገውን የትብብር ስራ በማስተባበር ሚናውን እንዲያበርክትም ተጠይቋል፡፡
በቀጣይ ሁለቱ አገራት በመካከላቸው ቋሚ እና ጠንካራ ግንኙነት በመፍጠር በሕግ እና ፍትሕ እንዲሁም በሰላም ማጽናት ዙሪያ በትብብር ለመሥራት የሚያስችሉ የመግባቢያ ሰነዶችን በመፈራረም ለተፈጻሚነቱ የበኩላቸውን ሚና እንደሚወጡ አረጋግጠዋል፡፡
በመድረኩ በውጭ ጉዳይ ሚኒስቴር የደቡብ አሜሪካ እና ካሪቢያ አገራት ጉዳዮች ዳይሬክቶሬት ዳይሬክተር አቶ ደምሰው ከበደ ተገኝተዋል፡፡
