በስዊዘርላንድ ጄኔቫ በተካሄደው የተባበሩት መንግስታት ድርጅት የዓለም አቀፉ የፍልሰት ድርጅት (International Organization on Migration) 116ኛው ምክር ቤት የሚኒስትሮች ስብሰባ የተሳተፉት የኢ.ፌ.ዲ.ሪ ፍትሕ ሚኒስቴር ሚኒስትር ዴኤታ ክቡር ዶ/ር ኤርምያስ የማነብርሃን ከስዊዘርላንድ የፍልሰት ጉዳዮች ስቴት ሴክሬታሪ ክቡር ሚስተር ቪንሴንዞ ማሲዮሊ ጋር በፍልሰት ጉዳዮች ላይ ውይይት አካሂደዋል፡፡
ከድርጅቱ ምክር ቤት ስብሰባ ጎን ለጎን በተካሄደው በዚሁ የሁለትሽዮች ውይይት ወቅት ክቡር ሚኒስትር ዴዔታው የኢትዮጵያን የፍልሰት ነባራዊ ሁኔታዎች፤ ፈታኝ ተግዳሮቶች እንዲሁም ምቹ ሁኔታዎችን በተመለከተ ለስዊዘርላድ አቻቸው አብራርተዋል፡፡
ሚኒስትር ዴዔታው አያይዘውም ሁለቱ አገራት በፍልሰት ዙሪያ በጋራ እየሰሩባቸው የሚገኙ ጉዳዮችን በመግለጽ ኢትዮጵያ መደበኛ ያልሆነ ፍልሰትን ለመከላከል፤ተጎጂዎችን መልሶ በማቋቋም እንዲሁም መደበኛ ፍልሰትን ለማጠናከር ለምታደርገው ጥረት የስዊዘርላንድ መንግስት እያደረገ ያለውን ሰፊ ድጋፍ አንሰተው ምስጋና አቅርበዋል፡፡
በመጨረሻም ሁለቱ አገራት በፍልሰት ጉዳዩች ላይ ትብብራቸውን አጠናክረው እንደሚቀጥሎ በመግለፅ በቀጣይ ትኩረት አድርገው በሚሰሩባቸው ጉዳዩች ላይ መክረዋል፡፡
