አስተዳደራዊ ፍትህን ለማስፈን የተደነገገውን የፌዴራል አስተዳደር ሥነ-ሥርአት አዋጅ በተሻለ ለማስተግበር እንዲረዳ ታስቦ የተጀመረው የስልጠና መርሀ-ግብር መሰጠቱ ቀጥሏል

አስተዳደር ሥነ-ሥርአት አዋጅን በተሻለ ለማስተግበር የሚያስችል አቅምን ከማጎልበት አንጻር በተጀመረው የሕግ ግንዛቤ ማስጨበጫ ሥልጠና መርሀ ግብር መሠረት ለፌዴራል ተቋማት ከፍተኛ እና መካከለኛ አመራሮች ሥልጠና እየተሰጠ ስለመሆኑ መዘገባችን ይታወሳል፡፡

መርሀ ግብሩ ቀጥሎ 34 የሚሆኑ ለባህልና ስፖርት ሚኒስቴር እና ለሚኒስቴር መስሪያ ቤቱ ተጠሪ ለሆኑት የኢትዮጵያ ስፖርት አካዳሚ፣ የኢትዮጵያ ጸረ አበረታች ቅመሞች ባለሥልጣን፣ የኢትዮጵያ ቤተ መዛግብትና ቤተ መጻህፍት አገልግሎት፣ የኢትዮጵያ ብሔራዊ ትያትር ከፍተኛ እና መካከለኛ አመራረሮች የአስተዳደር ሥነ ሥርዓት አዋጁን አስመልክቶ ሥልጠና ተሰጥቷል፡፡

ሥልጠናውን የሰጡት በፍትሕ ሚኒስቴር የመንግሥት ሕግ እና ፍትሕ አገልግሎት ዘርፍ ሚኒስትር ዴኤታ አማካሪ ወ/ት ሀወኒ ታደሰ በመመሪያ አወጣጥ ሂደት፣ ስለ አስተዳደራዊ ውሳኔ አሰጣጥ፣ በውሳኔ ላይ የሚቀርቡ አቤቱታዎች ስለሚስተናገዱበት አግባብ እንዲሁም በአዋጁ የተቀመጡትን ግዴታዎች አለማክበር የሚያሰከትለውን ውጤትና የፍርድ ቤቶች ኃላፊነትና ሥልጣንን አስመልክተው ሰፋ ያለ ማብራሪያ ሰጥተዋል፡፡

አማካሪዋ በማብራሪያቸው አስተዳደራዊ ፍትሕ አንደ ሌሎች የፍትሕ አይነቶች ሁሉ ዜጎች ሊኖራቸው የሚገባ መብት እንደሆነ እና የአዋጁ አጠቃላይ ፋይዳ አስተዳደራዊ ፍትሕ በማስፈን በዜጎችና በመንግሥት መካከል በሕግ ላይ የተመሰረተ ተገማች የሆነ ግንኙነት በመፍጠር የህገ-መንግሥት የበላይነት የተረጋገጠበትና መልካም የመንግሥት አስተዳደር መፍጠር መሆኑን በሰፊው አብራርተዋል፡፡

በቀረበው ገለጻ ላይ ተመርኩዘው ተሳታፈዎች ባነሷቸው ጥያቄዎችና አስተያየቶች ላይ ውይይት የተደረገ ሲሆን የተቋማቱ አመራሮች በሰጡት አስተያየት ለአዋጁ ተፈጻሚነት የበኩላቸውን ለመወጣት ያላቸውን ቁርጠኝነት ገልጸዋል፡፡

በንቅናቄው ቀጣይ ቀናት በርካታ የመንግሥት ተቋማት ሥልጠናውን እንዲወስዱ እንደሚደረግ ተጠቁሟል፡፡