የትግራይ ክልል ፍትህ አካላት አቅም ማጎልበት ላይ ያለመ ስልጠና ተሰጠ

ለትግራይ ክልል ፍትሕ አካላት (ዳኞች፣ ዐቃቤያነ ሕግ እና መርማሪ ፖሊሶች) በሰዎች መነገድ እና ሰዎችን በህገ ወጥ መንገድ ድንበር ማሻገር ወንጀል ምርመራ እና ክስ አሠራር ስርዓት ላይ የፍትሕ ሚኒስቴር ከሲቪፖል (CIVIPOL) ጋር በመተባበር የሶስት ቀናት ሥልጠና በቢሾፍቱ ከተማ ተሰጥቷል።

በሥልጠናው መርሀ-ግብር ላይ የመክፈቻ ንግግር ያደረጉት የፍትሕ ሚኒስቴር የተቋም ግንባታ እና የሪፎርም ዘርፍ ሚኒስትር ዴኤታ ክቡር ኤርሚያስ የማነብርሃን (ዶ/ር) እንደገለፁት የዚህ ሥልጠና ዋና ዓላማ የትግራይ ክልል ፍትሕ አካላት በሰዎች መነገድ እና በህገ ወጥ መንገድ ድንበር የማሻገር ወንጀልን አስከፊነት በመረዳት የፍትሕ አካላት ተገቢውን ምርመራ፣ ክስ እና ችሎት ክርክር ሂደት ወይም ፍርድ ሂደቱ ላይ ተገቢውን እውቀት እና ክህሎት እንዲኖራቸው ለማስቻል እንደሆነ ገልፀዋል። አያይዘውም በፍትሕ አካላት መካከል የሚኖረውንም ቅንጅታዊ አሠራር ለማጠናከር እንደሚረዳ አመላክተዋል፡፡

ሥልጠናው በዋናነት በኢትዮጵያ የሚፈጸሙ በሰዎች የመነገድ እና ሰዎችን በህገወጥ መንገድ የማሻገር ወንጀሎችን ለመመርመር እና ለማስቀጣት የተዘጋጀ የአሠራር ስርዓት ላይ ሲሆን የወንጀሎቹ ምንነት በዓለም ዓቀፍ ሕግ እና በሀገር ውስጥ ህጎች፣ ወንጀሎቹን መመርመርና ማስቀጣት፣ የወንጀል ተጎጂዎች ጥበቃ እና ሌሎች ተያያዥ ጉዳዮች ላይ መሠረት ያደረገ ነበር።

ይህ ሥልጠና በኢ.ፌ.ዲ.ሪ ፍትሕ ሚኒስቴር የንቃተ ሕግ፣ ትምህርትና ሥልጠና ዳይሬክቶሬት ከብሔራዊ የፍልሰት ትብብር ጥምረት ጽ/ቤት እና ሲቪፖል ጋር በመተባበር የተዘጋጀ ሲሆን ሥልጠናውም ለሶስት ተከታታይ ቀናት ተሰጥቷል።