በዓለም አቀፍ ደረጃ ባልተለመደ ሁኔታ በተቀሰቀሰው የበሽታ ወረርሽኝ በቱሪዝም ዘርፉ ላይ የደቀነው አደጋ በተለያዩ የማኅበረሰብ ክፍሎች እና በሀገሪቱ ኢኮኖሚ ላይ ከፍተኛ የሆነ አሉታዊ ተፅዕኖ እያስከተለ በመሆኑ፤
በኮቪድ 19 ዓለም አቀፍ ወረርሽኝ ምክንያት መንግስታት የወሰዱትን ፈጣንና ጠንካራ እርምጃዎች ተከትሎ ገደብ ተጥሎባቸው የነበሩ የጉብኝት እንቅስቃሴዎች ቀስ በቀስ እየላሉና በበርካታ የቱሪስት መዳረሻዎች የቱሪዝም እንቅስቃሴዎችን በድጋሚ እየተጀመሩ በመሆኑ፤
ሀገራችን ኢትዮጵያ የቱሪዝም እንቅስቃሴዎች ደህንነታቸው በተጠበቀ እና ኃላፊነት በተሞላበት ሁኔታ በማስተዳደር ለማስጀመር እንዲያስችል በዓለም አቀፍ ደረጃ የተዘጋጀውን ደህንነቱ የተጠበቀ የጉብኝት ፕሮቶኮል እና የአሠራር ስርዓት መቀበል አስፈላጊ ሆኖ ስለተገኘ፤
የጎብኚዎችን እምነት በድጋሚ ለመገንባት እና የቱሪዝም ዘርፍ እሴት ሰንሰለት ውስጥ የተሰማሩ ሰራተኞች የጤና ደኅንነትን ለማረጋገጥ የሚያስችል ግልፅ፣ ወጥ እና ፍትሐዊ የአሠራር ስርዓት መዘርጋት በማስፈልጉ፤
የባህልና ቱሪዝም ሚኒስቴር በኢትዮጵያ ፌዴራላዊ ዲሞክራሲያዊ ሪፐብሊክ የአስፈፃሚ አካላትን ሥልጣንና ተግባር ለመወሰን በወጣው አዋጅ ቁጥር 1097/2011 አንቀጽ 30 የተሰጡትን ተግባርና ኃላፊነቶች በአግባቡ ለመወጣት ይህንን መመሪያ አውጥቷል፡፡
