ሚኒስቴር መ/ቤቱ በተለያዩ የፕራይቬታይዜሽን ስልቶች የመንግሥት የልማት ድርጅቶችን/አክሲዮን ማህበራትን ወደ ግል አልሚዎች በማዛወር ውጤታማ ሥራ እያከናወነ እንደሆነ ይታወቃል፡፡ ከፕራቬታይዜሽን ፕሮግራም ጋር የተያያዙ የተለያዩ ክፍያዎችን በቅልጥፍና በግልጽነትና ተጠያቅነት በሰፈነበት አሠራር ለመሰብሰብ የሚያስችል መመሪያ ማውጣት አስፈላጊ ሆኖ በመገኘቱ፣

በተለይ ድርጅቶቹ ወደ ግል አልሚዎች የሚተላለፉት በውል ላይ ተመስርቶ በሙሉ ክፍያ ወይም በተራዘመ ክፍያ /differed payment/ በመሆኑ የሽያጭ ክፍያውንም ሆነ የርክክብ ልዩነት ትመና ክፍያ በተቀላጠፈና በግልጽ አሠራር ለመሰብሰብ እንዲቻል በመመሪያ መወሰን አስፈላጊ በመሆኑ፣

በመንግሥት እጅ የነበሩ አክሲዮን ማህበራት ወደ ግል አልሚዎች ከመተላለፋቸው በፊት በተለያዩ የማስፋፊያ ፕሮጄክቶች እንዲሁም የሚያጋጥማቸውን የስራ ማስኬጃ ችግር ለማቃለል ከኢንዱስትሪ ልማት ፈንድ በውል ላይ የተመሰረተ የብድር አገልግሎት እንዲያገኙ የሚደረግ በመሆኑ እንዲሁም ባተረፉት መጠን የመንግሥት ትርፍ ድርሻ የሚከፍሉ የሚደረግ በመሆኑ ድርጅቶቹ የተበደሩትን ክፍያ እና የነበረባቸውን የመንግሥት ትርፍ ድርሻ ሳያጠናቅቁ ወደ ግል አልሚዎች በሚዛወሩበት ወቅት ያለባቸውን እዳ ገዢው እንዲከፍል በውለታ ለነዱ እንዲካተት የሚደረግ በመሆኑ የክፍያውን አሰባሰብ በግልጽ ማስቀመጥ አስፈለጊ ሆኖ በመገኘቱ፣

የመንግሥት ልማት ድርጅቶች ሚኒስቴር በኢትዮጵያ ፌዴራላዊ ዴሞክራሲያዊ ሪፐብሊክ የአስፈፃሚ አካላትን ሥልጣንና ተግባር ለመወሰን በወጣው አዋጅ ቁጥር 916 /2008 አንቀጽ 31 (1)(ለ) በተሰጠው ሥልጣን መሠረት ይህንን መመሪያ አውጥቷል፡፡