በአዲስ አበባ ከተማ አስተዳደር የኢንዱስትሪ ልማት ቢሮ በአምራች ኢንዱስትሪ ንዑሳን ዘርፎች ላይ በማተኮር ለአምራች ኢንዱስትሪዎች ዘርፈ ብዙ ድጋፍ እያደረገ ይገኛል፡፡ በመሆኑም ለአምራች ኢንዱስትሪዎች የድጋፍ ማዕቀፎችን በመቅረፅና ተግባራዊ በማድረግ ሰፊ የሥራ ዕድል በመፍጠርና እና ለሀገራችንና ለከተማችን ኢኮኖሚ እድገት አስተዋጽኦ ማበርከት ማስቻሉ፤

የአምራች ኢንዱስትሪዎችን የዕድገት ደረጃና ፍላጎት መሠረት ያደረገ ድጋፍ በመስጠት፣ ጥራትና ምርታማነታቸውን በማሻሻል ተወዳዳሪና ብቁ እንዲሆኑ ለማድረግ በማስፈለጉ፣ በሚደረግላቸው ድጋፍ እና በሚያከናውኑት የምርታማነት እድገት መሠረት የላቀ የዕድገት ደረጃ ሽግግር እንዲያደርጉ ድጋፍ በማድረግ የማያቋርጥ የኢንዱስትሪ እድገት ማረጋገጥ በማስፈለጉ፤

በተጨማሪም ጥራቱንና ደህንነቱን የጠበቀ ምርትና አገልግሎት እንዲሰጡ አስፈላጊ በመሆኑ እና የላቀ የዕድገት ደረጃ ሽግግር እንዲያደርጉ በማስፈለጉ፤

ለአምራች ኢንዱስትሪዎች የእድገት ደረጃ አወሳሰንና ሽግግር ሂደት ላይ የሚስተዋሉ ችግሮችንና በድጋፍ ማዕቀፍ አተገባበር ሂደት የሚታዩ ችግሮችን ግልጽና ተጠያቂነት ያለው አሠራር ሥርዓት በመዘርጋት መፍታት በማስፈለጉ፤

ጥራትና ምርታማነታቸው እንዲሳለጥ ለማድረግ የካይዘን አሠራርን በውጤታማነት ተግባራዊ ማድረግ ለኢንዱስትሪው የሚኖረውን ፋይዳ በመገንዘብ በአሠራር እና ሕግ ማዕቀፍ መደገፍ የሚገባ በመሆኑ፤

የኢንዱስትሪ ልማት ቢሮ የአምራች ኢንዱስትሪዎችን ምርታማነትና ውጤታማነትን ለማሳደግ፣ ያለውን ውስን ሃብት በፍትሃዊነት፣ በአሳታፊነት እና በተወዳዳሪነት መንፈስ ግልፅ አሠራር በመዘርጋት መተግበር በማስፈለጉ፤

የአዲስ አበባ ከተማ ኢንዱስትሪ ልማት ቢሮ በአዲስ አበባ ከተማ አስተዳደር አስፈፃሚ አካላት ሥልጣንና ተግባራቸውን ለመወሰን በወጣው አዋጅ ቁጥር 84/2016 ዓ.ም አንቀጽ 16 ንዑስ አንቀጽ (2) ተራ ፊደል (ሠ) መሠረት ይህንን መመሪያ አውጥቷል፡፡