በአዲስ አበባ ከተማ ውስጥ ከመሬት ጋር ከተያያዙት ዘርፈ ብዙ ችግሮች አንዱና ዋነኛው አብዛኛው ይዞታ ህጋዊ የይዞታ ማረጋገጫ ሰነድ የሌለው መሆኑና በተጨማሪም በመሬት ላይ የሚደረገውን ህገወጥ ተግባር ለመከላከል ህጋዊ የሆነውና በህገወጥ የተያዘው ይዞታ ተቀላቅሎ መገኘቱ እንቅፋት ሆኖ ቆይቷል፡፡ በመሆኑም ይህንን ችግር ከመሠረቱ ለመፍታት የሚያግዙ መመሪያዎችና የአሠራር ማኑዋሎች ተዘጋጅተው ተግባራዊ በመደረግ ላይ ናቸው። ሆኖም እስከአሁን የተዘጋጁት መመሪያዎችና ማኑዋሎች ከኃይማኖት ተቋማት ይዞታዎች ውጭ በተያዙት ይዞታዎች መስተንግዶ ላይ ያተኮሩ በመሆናቸው በኃይማኖት ተቋማት በተለያየ ጊዜ በልዩ ልዩ መንገዶች ለተያዙት ይዞታዎች የይዞታ ማረጋገጫ ካርታ ጥያቄ ምላሽ ለመስጠት ሳይቻል ቀርቷል፡፡

ስለሆነም በአዲስ አበባ ከተማ ውስጥ ህጋዊ የይዞታ ማረጋገጫ ሰነድ ለሌላቸውና እስከ መሰከረም 9/1998 ዓ.ም ለተያዙ የኃይማኖት ተቋማት ይዞታዎች የይዞታ ማረጋገጫ ካርታ አዘጋጅቶ ለመስጠትና ችግሩን ከመሰረቱ ለመፍታት የሚያግዙ መመሪያዎችና የአሠራር ማኑዋሎች አዘጋጅቶ ተግባራዊ በማድረግ የኃይማኖት ተቋማት ይዞታዎችን ከተቋማቱ እገልግሎት እንጻር ማስተናገድ ተገቢ በመሆኑ ለዚሁ የሚያግዝ እራሱን የቻለ አሠራር ቀየሶ ተግባራዊ ማድረግ በማስፈለጉ፤

በከተማ ዉስጥ የአምልኮና እና የዘላቂ ማረፊያዎች ያለሕጋዊ ፈቃድ እየተያዘ መሆናቸው በሕዝብ ጤና እና ኑሮ በከተማው አጠቃላይ እድገት ላይ ሊያስከትል የሚችለውን ችግር በመቅረፍ የቦታዎቹ አጠቃቀምና አስተዳደር ዘመናዊ እና ተገቢውን ደረጃ ያሟላ እንዲሆን በማድረግ ሕጋዊ ሥርዓት ማስያዝ አስፈላጊ ሆኖ በመገኘቱ፤

የከተማው አስተዳደር ኃይማኖቶችን ሁሉ በእኩል ደረጃ በከተማዉ መዋቅራዊ ኘላን በተመለከተው የማኀበራዊ መሠረተ ልማት አውታር፣ የአምልኮና የዘላቂ ማረፊያ አገልግሎት ቦታዎችን ስርጭት በመከተል አገልግሎቶችን ማስተዳደር የሚገባዉ በመሆኑ፤