አገራችን በሁሉም መስኮች በከፍተኛ የዕድገትና የለውጥ ጎዳና ላይ መሆኗ ይታወቃል፡፡ በተለይም የትምህርትን ለሁሉም ተደራሽነትን በማስፋትና የቅበላ አቅምን በማሳደግ ለዘመናት ትምህርት ማግኘት የጥቂቶች መብት የሆነበትን ሥርዓት ከመሠረቱ በመቀየር በትምህርቱ ዘርፍ የታየው እመርታ የሌሎች ዕድገቶቻችን ጠንካራ መሠረት እየሆነ መምጣቱ በገሀድ የሚታይ እውነታ ሆኗል፡፡

በተለይም ሁለትና ሶስት ይቆጠሩ የነበሩት የከፍተኛ ትምህርት ተቋማት ከሰላሳ በላይ ቁጥራቸው እንዲጨምር በመደረጉ ቀደም ሲል ከ2ኛ ደረጃ ትምህርት በላይ ዕድል ማግኘት ያልቻሉና በዚሁ ደረጃ ወደ ሥራ ዓለም የተቀላቀሉ የሲቪል ሰርቪሱ አባላት አጋጣሚውን በመጠቀም ከከፍተኛ ትምህርት ተቋማቱ በተለያዩ የትምህርት ዓይነቶች እየተመረቁ በመውጣት ላይ ይገኛሉ፡፡ ከእነዚህም ውስጥ በተለይ በጽህፈት ሥራ ላይ የተሰማሩ በአብዛኛው ሴት እህቶቻችን ዕድሉን በሰፊው እየተጠቀሙበት ቢገኙም በፀሀፊነት ያገለገሉበትን የሥራ ልምድ ከሌሎች የሥራ ዘርፎች ጋር አግባብነቱን አረጋግጦ የሰጡት አገልግሎት ከከፍተኛ ትምህርት ተቋም ካመጡት የትምህርት ማስረጃ ጋር በማጣመር ከፍ ባሉ የፕሮፌሽናል የሥራ መደቦች ላይ እንዲመደቡበት ማድረግ አለመቻሉ የሠራተኞቹ የቅሬታ ምንጭ ሆኖ ቆይቷል፡፡

በመሆኑም ይህንኑ ሁኔታ ለመለወጥና ሠራተኞቹም ለረዥም ጊዜ የሰጡትን አገልግሉት ዋጋ ማሳጣት አግባብ ሆኖ ባለመገኘቱ የፌዴራል ሲቪል ሰርቪስ ሚኒስቴር ይህን መመሪያ አዘጋጅቷል፡፡