የውሃ ነክ ሥራ ጥናት፣ ዲዛይን፣ ግንባታና ቁጥጥር በዘርፉ የሰለጠነ ባለሙያ፣ መሣሪያና ካፒታል የሚጠይቅ የሥራ መስክ ከመሆኑም በላይ የውሃ ሀብታችን ለልማት እንዲውል በማስቻል ረገድ ለአገራዊ ኢኮኖሚ ዕድገት የሚጫወተው ሚና ከፍተኛ በመሆኑ፣

በውሃ ነክ ሥራዎች የሚሰማሩ ባለሙያዎች ሙያዊ ብቃት ያላቸው መሆኑን ማረጋገጥ፣ እንዲሁም በመስኩ የተሰማሩ፣ ተቋራጭና አማካሪ ድርጅቶች በቂ የባለሙያ ስብጥርና ሥራውን ለማከናወን የሚያስችል አስፈላጊ መሳሪያዎች ያላቸው ወይም ማግኘት የሚችሉ መሆኑን ማረጋገጥ የሕዝብንና የመንግሥትን ጥቅም ከማስጠበቅ አንፃር ከፍተኛ ጠቀሜታ ያለው በመሆኑ፤

ይህንንም ተግባራዊ ለማድረግ እንዲቻል በዘርፉ የተሰማሩትን ባለሙያዎች ተቋራጮችና አማካሪ ድርጅቶች ከሥራ ጥራትና ብቃት አንፃር መቆጣጠር የሚያስችል መመዘኛ መስፈርት መኖር ያለበት በመሆኑ፣

የውሃ መስኖና ኤሌክትሪክ ሚኒስቴር በኢትዮጵያ የውሃ ሀብት አስተዳደር አዋጅ ቁጥር 197/1992 በአንቀጽ 31 እና በኢትዮጵያ የውሃ ሀብት አስተዳደር ደንብ ቁጥር 115/1997 አንቀጽ 20 እና 21 መሠረት ይህንን መመሪያ እውጥቷል፡፡