በኢትዮጵያ ሦስት ዋና ዋና (መደበኛ፣ ተሸጋጋሪና ኢመደበኛ) የዘር ሥርዓቶች አሉ፡፡ የተለያዩ ጥናቶች እንደሚያረጋግጡት በየዓመቱ በመደበኛ የዘር ሥርዓት በኩል የሚቀርበው የዘር መጠን ከ20 በመቶኛ አይበልጥም፡፡
ነገር ግን በፍጥነት እያደገ የመጣውን የአርሶ አደሩን የምርጥ ዘር ፍላጎት በመደበኛ ሥርዓት በሚቀርበው ዘር ብቻ ማሟላት ባለመቻሉ በኢመደበኛ ስርዓት ተመርቶ የሚቀርበው ዘር ከጊዜ ወደ ጊዜ እየጨመረ መጥቷል፡፡ ይህ ዘር ግን ጥራቱን ጠብቆ ለአርሶ አደሩ ባለመቅረቡ ሃገሪቱ በምትፈልገውና በምትጠብቀው መልኩ ምርትና ምርታማነትን ማሻሻል አላስቻለም፡፡
ጥራት ያለው የዘር አቅርቦት ለምርትና ምርታማነት ማደግና ብሎም ለአርሶ አደሩ ተጠቃሚነት አስፈላጊ በመሆኑና ይህ ደግሞ በአንድ ጊዜ ለሁሉም አርሶ አደር ማዳረስ ቀላል ባለመሆኑ አርሶ አደሮች እንደ አቅማቸው በተለያየ ደረጃ የሚገኝ የዘር ጥራት እየተጠቀሙ በሂደት ከፍተኛ ጥራት ያለውን ዘር መጠቀም ወደሚችሉበት ደረጃ ለማሸጋገር የሚያስችል ሥርዓት መቀየስ በማስፈለጉ ምክንያት በዘር አዋጁ መሠረት ይህ መመሪያ ወጥቷል፡፡
