የመድሃኒት ፈንድና አቅርቦት ኤጀንሲ በሀገሪቱ ዋና ዋና የተረጋገጡ የጤና ችግሮች ላይ ያተኮሩ ደህንነታቸውና ፈዋሽነታቸው የተረጋገጡ መድሃኒቶችን በበቂ መጠንና በተመጣጣኝ ዋጋ በዋነኛነት ለመንግስታዊ የጤና ተቋማት ማቅረብ በአዋጅ ከተሰጡት ዋናው ተልዕኮው ነው፡ይህን ተልዕኮ ለመወጣት የስርጭትና የተሸከርካሪ ስምሪት አስተዳደር ተግባሮችን በዘመናዊና በተቀናጀ መንገድ ማከናወን ቀዳሚና ተገቢውን ትኩረት የሚሻ ጉዳይ ነው፡፡
የኤጀንሲውን መድሃኒትና የህክምና መገልገያ መሳሪያዎችን የስርጭትና የተሽከርካሪ ስምሪት አስተዳደር ተግባሮች ቀልጣፋ፣ ግልጽነት፣ ወጥነትና ተጠያቂነት ያላቸው እንዲሆኑ ለማድረግ በዋናው መ/ቤትና በቅርንጫፎች መካከል የስራና የኃላፊነት ክፍፍል ማድረግና በመረጃ ልውውጥ ላይ በመመስረት የተቀናጀ የስርጭትና የተሸከርካሪ ስምሪት አስተዳደርን ማስፈን ያስፈልጋል፡፡
ስለሆነም ኤጀንሲው ውጤታማ የሆነ የተቀናጀ የመድሃኒት ስርጭትና የመኪና ስምሪት አስተዳደርን እውን ለማድረግ እንዲቻል በአዋጅ ቁጥር 553/99 በአንቀጽ 12(5) መሠረት ይህ መመሪያ እንዲወጣ ተደርጓል፡፡
