በዝውውር ላይ የሚገኙ ሕጋዊ የገንዘብ ኖቶች በሥራ ላይ ከዋለ ረጅም ጊዜ የተቆጠረ ስለሆነ ለሐሰተኛ የገንዘብ ኖቶች ሕትመት እና ስርጭት እየተጋለጡ በመሆኑ፣
የተሻሻለ የደኅንነት መጠበቂያ ምልክቶችን በኖቶቹ ላይ በማድረግ የአገሪቱ ሕጋዊ የገንዘብ ኖቶችን የጥራት ደረጃ በማሻሻል የሀሰተኛ ገንዘብ ሕትመት እና ስርጭት ወንጀልን መከላከል በማስፈለጉ፣
ሕብረተሰቡ ለትላልቅ የገንዘብ ኖቶች ያለውን ፍላጎት ከግንዛቤ ዉስጥ በማስገባት የባለ 200 ብር ኖት በማሳተም እና የገንዘብ አቅርቦትን በማሻሻል የህብረተሰቡን ፍላጎት ማርካት አስፈላጊ በመሆኑ፣
ከባለ 5 ብር በስተቀር በአሁኑ ጊዜ በዝውውር ላይ የሚገኙ የገንዘብ ኖቶችን ባንኩ በሚያሳትማቸው አዳዲስ የገንዘብ ኖቶች ሙሉ በሙሉ በመቀየር የገንዘብ አጠቃቀምን ማሻሻል አስፈላጊ ሆኖ በመገኘቱ፣
የኢትዮጵያ ብሔራዊ ባንክ በኢትዮጵያ ብሔራዊ ባንክ ማቋቋሚያ (እንደተሻሻለ) አዋጅ ቁጥር 591/2000 አንቀጽ 5(1)፣ 18(2) እና 27 (2) በተሰጠው ሥልጣን መሠረት የሚከተለውን መመሪያ አውጥቷል፡፡
