ወላጆቻቸውን በተለያዩ ምክንያት ያጡና በአስቸጋሪ ሁኔታ ውስጥ የሚገኙ ህጻናትን በተለያዩ አማራጭ የድጋፍና እንክብካቤ ዘዴዎች ሊደገፉ እንደሚገባ በኢፌዴሪ ህገ መንግሥት እና በሌሎች ዝርዝር ህጎች መንግሥት የገባውን ቃል ወደ ተግባር ለመለወጥ የሚያስችል የአደራ ቤተሰብንና የሀገር ውስጥ ጉዲፈቻ አገልግሎት የአሠራር ስርዓትን ማጠናከር አስፈላጊ ሆኖ በመገኘቱ፣

በተሻሻለው የቤተሰብ ሕግ ጉዲፈቻ የሚፈጸምባቸው መሠረታዊ መርሆዎች የተቀመጡ ቢሆንም ዝርዝር የአፈጻጸም መመሪያ ባለመኖሩ በአሰራሩ ላይ ወጥነትና ቅንጅታዊ አሠራር የጎደለው ሆኖ በመታየቱ አሰራሩ ሕግን የተከተለ፣ ወጥነት ያለውና ቅንጅታዊ አሰራሩ ምን መምሰል አለበት የሚለውን የሚወስን መመሪያ ማውጣት በማስፈለጉ፣

ኢትዮጵያ ተቀብላ ያጸደቀቻቸው የዓለም ዓቀፍ የሕፃናት መብት ኮንቬሽን እና የአፍሪካ የህጻናት መብትና ደኅንነት ቻርተር የአደራ ቤተሰብና የሀገር ውስጥ ጉዲፈቻ በተመለከተ ያስቀመጡትን ድንጋጌዎች በተሟላ ሁኔታ ተግባራዊ ለማድረግ የሚስችል መመሪያ ማዘጋጀት አስፈላጊ ሆኖ በመገኘቱ፣

በአገር ውስጥ ጉዲፈቻ አፈጻጸም ያለውን የአሠራር ችግር ለማስወገድ የሚያስችል ጠንካራ የሆነ የክትትልና ድጋፍ የአሠራር ስርዓት መዘርጋት ተገቢ ሆኖ በመገኘቱ፣

የሴቶች፣ ህጻናትና ወጣቶች ሚኒስቴር ይህንን የአደራ ቤተሰብና የሀገር ውስጥ ጉዲፈቻ የአፈጻጸም መመሪያ አውጥቷል፡፡