የከተማ ልማትና ኮንስትራክሽን ሚኒስቴር የሀገራችንን ራዕይ እውን ከማድረግ አንፃር የሚጫወተው ሚና ጉልህ እንደሆነ የሚታወቅ ሲሆን በተለይም ደግሞ አሁን በያዝነው የልማት ምዕራፍ ከተሞችን የኢንዱስትሪ መዳረሻ እንዲሆነ ከማድረግ አንፃር ከፍተኛ ተልዕኮ ተሰጥቶታል፡፡ የተልዕኮ ስኬቱ የልማት ኃይሎችን የጋራ እንቅስቃሴና ርብርብ የሚጠይቅ ሲሆን ከሁሉ በላይ ደግሞ የሰፊው የከተማ ነዋሪ ንቅናቄ ስምረት እንደሆነ እሙን ነው፡፡ ይህንን ንቅናቄ ለመፍጠርና ተልዕኮውን ለማሳካት በርካታ እንቅስቃሴዎች እየተደረጉ ያሉ ሲሆን ከእነዚህ መካካል አንዱ በየዓመቱ የሚከበረው የኢትዮጵያ ከተሞች ሳምንት ነው፡፡

በዚሁ መሠረት በየዓመቱ በሚከበረው የኢትዮጵያ ከተሞች ሳምንት ላይ ከሚከናወኑት ዋና ዋና ጉዳዮች መካከል አንዱ ሚኒስትሩ ለሚመራቸው ዘርፎች እድገት ጉልህ አስተዋፅኦ ላበረከቱ የልማት ኃይሎች እውቅና መስጠት ነው፡፡ ከዚህ አንፃር የልማት ኃይሎች አስተዋፅኦ በየደረጃው በመለየትና በመገምግም ምርጥ ተሞክሮን ለመቀመርና ለማስፋት ብሎም በርካታ ሞዴሎች እንዲወጡ ለማጠናከር የሚያስችል ግልፅና ፍትሃዊ የአሠራር ስርዓት መፍጠር አስፈላጊ ሆኖ ተገኝቷል፡፡

በመሆኑም የከተማ ልማትና ኮንስትራክሽን ሚኒስቴር ዘርፉን ከመምራት አንፃር በተሠጠው ሥልጣን መሠረት ይህን የልማት ኃይሎች እውቅና መስጫ መመሪያ አውጥቷል።