ባለሥልጣኑ የሚሰጣቸውን አገልግሎቶች ማስፋት፣ በአዳዲስ ቴክኖሎጂዎች እና አሰራሮች የአገልግሎቶቹን የጥራት ደረጃ ማሻሻል እንዲሁም አገልግሎቶቹን ለመስጠት የሚያወጣውን ወጪ መሸፈን የሚያስችል ሥርዓት መዘርጋት አስፈላጊ ሆኖ በመገኘቱ፤

የሬዲዮ ፍሪኩዌንሲ ስፔክትረም ፈቃድ እና የመጠቀሚያ ክፍያ የሬዲዮ ፍሪኩዌንሲ ስፔክትረም ሀብት ለኢትዮጵያ ሕዝብ ጥቅም የሚኖረው ተገቢ ዋጋ ላይ የተመሰረተ መሆኑን እና ባለሥልጣኑ የሬዲዮ ፍሪኩዌንሲ ስፔክትረም ሀብት ለማስተዳደር፣ ፈቃድ ለመስጠት እና ለመቆጣጠር የሚያወጣውን ወጪ መሸፈን መቻሉን ማረጋገጥ አስፈላጊ ሆኖ በመገኘቱ፤

የቴሌኮሙኒኬሽን ቁጥር ፈቃድ እና የመጠቀሚያ ክፍያ የቴሌኮሙኒኬሽን ቁጥር ሀብት ለኢትዮጵያ ሕዝብ ጥቅም የሚኖረው ተገቢ ዋጋ ላይ የተመሰረተ መሆኑን ማረጋገጥ አስፈላጊ ሆኖ በመገኘቱ፤

ከኮሙኒኬሽን አገልግሎት ፈቃድ፣ ከሬዲዮ ፍሪኩዌንሲ ስፔክትረም እና ከቁጥር ምደባ እና አስተዳደር እንዲሁም ከሬዲዮ ኮሙኒኬሽን እና ከቴሌኮሙኒኬሽን መሣሪያዎች የቴክኒክ ብቃት ማረጋገጫ አገልግሎት የሚሰበሰበውን የክፍያ መጠን በአግባቡ መወሰን በማስፈለጉ፤

ባለሥልጣኑ የሚያስከፍላቸውን የኮሙኒኬሽን አገልግሎት ፈቃድ እና የሬጉላቶሪ ክፍያዎችን ውጤታማ እና ቀልጣፋ በሆነ መንገድ መሰብሰብ የሚቻልበትን ሥርዓት መዘርጋት አስፈላጊ ሆኖ በመገኘቱ፤

ባለሥልጣኑ የሚስከፍላቸውን የፈቃድ እና የሬጉላቶሪ አገልግሎት ክፍያዎች ለተገልጋዮች ግልጽ እና ተደራሽ ማድረግ አስፈላጊ እንደሆነ በመታመኑ፤

እነዚህን ዓላማዎች ከግብ ለማድረስ በሥራ ላይ ያለውን የፈቃድ አገልግሎት እና የሬጉላቶሪ ክፍያዎች መመሪያዎች ማሻሻል አስፈላጊ ሆኖ በመገኘቱ፤
ባለሥልጣኑ በኮሙኒኬሽን አገልግሎት አዋጅ ቁጥር 1148 /2011 አንቀጽ 26(1)፣29(1) እና 54(2) መሠረት ይህን የኮሙኒኬሽን አገልግሎት ፈቃድ እና የሬጉላቶሪ ክፍያዎች መመሪያ አውጥቷል፡፡