የአዲስ አበባ ከተማ ስራ አጥ ነዋሪ ዜጎችን የስራ ዕድሎች በመፍጠር ወደ ስራ ለማሰማራት ትልቁ እና ዋነኛው ማነቆ በቂ የመስሪያ ቦታ አቅርቦት ችግር መሆኑን በመገንዘብ ይህንን ችግር በመፍታት በጥቃቅንና አነስተኛ ኢንተርፕራይዞች ልማት ስትራቴጂን ተግባራዊ በማድረግ ድህነትና ስራ አጥነትን ለመቀነስ በስትራቴጂው ከተቀመጡት ለኢንተርፕራይዞች ከሚሰጡ የድጋፍ ማዕቀፎች ውስጥ አንዱ የመስሪያ ቦታ አቅርቦት በመሆኑ፣

በተለያየ መንገድ የተገነቡ እና ህጋዊ የአስተዳደር ስርዓት ያልተዘረጋላቸው ሼዶች፣ ተለጣፊ ሱቆች፣ መደብሮችና ሌሎች መስርያ ቦታዎች ቢኖሩም መመሪያ ተዘጋጅቶላቸው በሚፈለገው አግባብ የማይተዳደሩ ስለነበር ችግሩ ዓመታትን ያስቆጠረ የመልካም አስተዳደር ችግር በመሆኑ፣

ቀደም ሲል በጊዚያዊ የሊዝ ውል በተለያዩ ተቋማት በውል፣ በውሳኔና ያለምንም ማስረጃ ለኢንተርፕራይዝና አምራች ኢንዱስትሪዎች አገልግሎት እንዲውሉ ተላልፈው የውል ዘመናቸው የተጠናቀቀም ሆነ ያልተጠናቀቀ በግለሰብ፣ በመንግሥትና በተለያዩ በጎ አድራጎት ድርጅቶች የተገነቡ ሼዶች፣ ተለጣፊ ሱቆች፣ መደብሮች፣ መሸጫና ማሳያ ኢምፐርየም እና ህንፃዎችን ግልፅ በሆነ መንገድ ርክክብ ለማድረግና ቀደም ሲል ስራ ላይ የነበረው መመሪያ ቁጥር 77/2014 ሲተገበር ያጋጠሙ ተግዳሮቶችን ከግምት ውስጥ በማስገባት ማሻሻያዎችን ያካተተ አዲስ መመሪያ ማውጣት አስፈላጊ ሁኖ በመገኘቱ፣

የአዲስ አበባ ከተማ አስተዳደር የስራ፣ ኢንተርፕራይዝና ኢንዱስትሪ ልማት ቢሮ በአዲስ አበባ ከተማ አስተዳደር አስፈፃሚ አካላትን ሥልጣንና ተግባር ለመወሰን በወጣው አዋጅ ቁጥር 74/2014 አንቀጽ 15 ንዑስ አንቀጽ 2 ተራ ፊደል (ሠ) መሠረት ይህን መመሪያ አውጥቷል፡፡