በአዲስ አበባ ከተማ በስፋት ከሚስተዋሉ መጠነ ሰፊ የትራንስፖርት አገልግሎት አቅርቦት ችግሮች መካከል አንዱ እና ዋነኛው፤ የተሽከርካሪ ማቆሚያ ስፍራና አጠቃላይ የአሠራር ሂደት ነው። በትራንስፖርት ዘርፍ ትራንስፖርትና የተሽከርካሪ ማቆሚያ አገልግሎት የማይነጣጠሉ መሠረታዊ የሆኑ ጉዳዮች ናቸው። የመንገድ ላይና ከመንገድ ውጪ ያሉ የመኪና ማቆሚያ ስፍራዎች እጥረትና የአስተዳደር ችግሮች በሰፊው የሚስተዋሉ ሲሆን ተጠቃሚዎቹም ተሽከርካሪዎች ለማቆም ከቦታ ቦታ በሚያደርጉት እንቅስቃሴ በትራፊክ ፍሰቱ ላይ ተጨማሪ አሉታዊ ተጽዕኖ በመፍጠር ያለውን ወቅታዊ የትራፊክ መጨናነቅ ችግር የበተጠ እንዲባባስ አድርጎታል።

የከተማውን የትራፊክ ፍሰት ለማሳለጥና ተደራሽ ለማድረግ በከተማው አስተዳደር እየተከናወኑ ካሉ ተግባራት መካከል ደረጃውን የጠበቀና ለተጠቃሚዎች ምቹ የሆኑ የተሽከርካሪ ማቆሚያ /ፖርኪንግ/ መሰረተ ልማቶች መገንባትና ማስፋፋት አንዱ በመሆኑና የከተማው አስተዳደር በትልቅ ወጪ የተለያዩ የተሸከርካሪ ማቆሚያ እያለማ መሆኑ ይታወቃል፤

እነዚህ የለሙ እና በመልማት ላይ የሚገኙ የተሽከርካሪ ማቆሚያ መሰረተ ልማቶች የታለመላቸውን ዓላማ ይመቱ ዘንድ የሚተዳደሩበትን ሥርዓት መዘርጋት አስፈላጊ ሆኖ በመገኘቱ፤

በከተማችን ለሚገኙ ስራአጥ ወጣቶች የስራ እድል ከመፍጠር አንጻር ከተማው ውስጥ ያሉ ወጣቶችን በተሽከርካሪ ማቆምያ አስተዳደር ስራ ላይ በማሰማራት ስራውን በአግባቡና በኃላፊነት እንዲሰሩ ለማደርግ በማስቻል እረገድ ከፍተኛ ሚና ይጫወታል ተብሎ በመታሰቡ የአዲስ አበባ ከተማ አስተዳደር የመንገድና ትራንስፖርት ቢሮ በአዋጅ ቁጥር 43/2007 አነቀፅ 47 በተሰጠው ሥልጣን መሠረት ይህንን በከተማዋ አስተዳደር ወጪ የተገነቡት የተሸከርካሪ ማቆሚያ መሰረተ ልማት አስተዳደር መመሪያ አውጥቷል፡፡