በኢትዮጵያ ፈጣን የከተሞች መስፋፋትን ተከትሎ የከተማ ነዋሪዎችንና የሌሎች ባለድርሻ አካላትን ተሳትፎ በማጠናከር መልካም ተሞክሮዎችንና ልምዶችን በማስፋፋት የከተማ ልማት ፖሊሲውን እና የከተማ ልማት ፕሮግራሞችን ትግበራና ስኬት ማፋጠን ይቻል ዘንድ አመታዊ የከተሞች ሣምንት የተሰየመ ሲሆን የኢትዮጵያ ከተሞች ሣምንት በተለያዩ ከተሞች አስተናጋጅነት በየአመቱ በሀገር አቀፍ ደረጃ ይከበራል፡፡

ከኢትዮጵያ ከተሞች ሣምንት አበይት ክንውኖች መሀከል ከተሞችን የማስተዋወቅ ስራ አንዱ ነው:: የኢትዮጵያ ከተሞችም ባለፉት ዓመታት በተፈጠረላቸው ምቹ ሁኔታ ከፍተኛ ዕድገት ያስመዘገበበትና ለሃገራዊ ምጣኔ ሃብት የሚሰጡት ግብዓት ከፍ ያለበት ሁኔታ የተስተዋለ ሲሆን ይህም ከተሞች ለኢንቨስትመንት፤ ለገበያ፣ ለቱሪዝም ወዘተ በራቸውን ክፍት ማድረግና ምቹ ሁኔታዎችን በመፍጠር ያገኙት ውጤት ነው:: በቀጣይነትም ከተሞቻችን እርስ በእርስ ብቻ ሳይሆን ከዓለም ከተሞችም ጋር ተወዳዳሪ ሆኖ መገኘት ይጠበቅባቸዋል፡፡ ይህ ውድድር ከተሞች ዕድገታቸውን ለማፋጠንና የነዋሪዎቻቸውን ጥያቄዎች ለመመለስ ከሚያደርጉት ጥረት በተጨማሪ ብቃት ያለው ራስን የማስተዋወቅ (professional city marketing) ስራን የሚጠይቅ ነው፡፡ ስለዚህም ከተሞች ከመቼውም ይበልጥ በተደራጀና ዓለም ዓቀፍ የጥራት ደረጃን በጠበቀ መልኩ ራሳቸውን የማስተዋወቅ እና የመሸጥ ስራን አጠናክረው ማከናወን ይጠበቅባቸዋል፡፡ የኢትዮጵያ ከተሞች ሣምንት ይህንን ሁኔታ ከግምት ውስጥ በማስገባት የከተሞቻችንን ራስን የማስተዋወቅ ስራ ለማገዝ ይቻል ዘንድ አገር አቀፍ የኢትዮጵያ ከተሞች ኤግዚቢሽንን በፕሮግራሞቹ አካቷል፡፡

ይህ መመሪያ የኢትዮጵያ ከተሞች ሣምንት ኤግዚቢሽንን በሚመለከት ለተሳታፊ ከተሞች ጠቃሚ መረጃ በመስጠት አንዲሁም የአዘጋጆችን፣ የተባባሪዎችን እንዲሁም የተሳታፊዎችን ሚና በመለየት በባህር ዳር ከተማ ለአምስተኛ ጊዜ የሚከበረውን የኢትዮጵያ ከተሞች ሳምንት ኤግዚቢሽን የሚመራበትን ስርኣት ለመደንገግ የተዘጋጀ ነው፡፡