የዕፅዋት አዳቃይ መብት ከአዕምሮአዊ ንብረት መብት እንደ አንደ የሚቆጠር ሲሆን፤ የዚህ መብት ጥበቃ በተመሳሳይ ከኢኮኖሚያዊ ልማት ጋር ትስስር ይኖረዋል ተብሎ ይታመናል፤ ይህ ከሆነ ደግሞ የዕፅዋት አዳቃይ መብት በምርታማነት ዕድገት ላይ የራሱ የሆነ አስተዋፅዖ አለው፡፡
ይህን ኢኮኖሚያዊ ጠቀሜታ ለማስገኘት ሲባል አዳዲስ ዝርያዎችን ከውጭ የማስገባት አስፈላጊነት በቅድሚያ የሚነሳ ጉዲይ ሲሆን ዝርያውን ያፈለቁ አዳቃዮች ከግኝታቸው ተጠቃሚ ማድረግ ባለመብቱን እና በዘርፉ የተሰማሩትን አዳዲስ ግኝቶች ከማነሳሳት ባለፈ እንደ ኢትዮጵያ ላሉ በምግብ ራስን ለመቻል ከፍተኛ ጥረት ለሚያደርጉ ሀገራት የሚያስገኘው ጥቅም የጎላ ነው፡፡
በተጨማሪም ከዚህ አዋጅ በፊት የነበረው የዕፅዋት አዳቃዮች መብት አዋጅ ቁጥር 481/1998 ከነዐባሪውና ከዓለም ዓቀፍ አሠራር እና ሁኔታዎች ካለመጣጣሙም በላይ የማስፈፀሚያ ደንብና መመሪያ ሳይወጣለት በመቅረቱ ሥራ ላይ ሳይውል በአዋጅ ቁጥር 1068/2010 እንዲተካ ተደርጓል፡፡
